@mongolfont.shx Монгол фонтыг шинэчиллээ

@mongolfont.shx фонтыг шинээр зургийн файл үүсгэн хэрэглээд явахад ямар нэгэн асуудалгүй. Харин хуучин зурган дээр ажиллахад хэрвээ arimon.shx фонт ашигласан текстүүд байвал таарахгүй тул танигдахгүй харагдана. Үүнийг засахын тулд arimon.shx фонтыг дахин ашиглахад хүрнэ. Уг зургаа өөр газар өгөхийн тулд заавал энэ хоёр фонтыг дагалдуулах хэрэгтэй болно.

Тэгвэл шинэ хувилбар болох @mongolfont.shx фонт нь unicode болон arimon.shx хоёрыг зэрэг багтаасан тул arimon.shx –оор бичсэн текст болон Unicode –оор бичсэн текстийн аль алинд таарна. Нэг л фонт хуучнаар бичигдсэн болон Unicode –оор бичигдсэн текстүүдийг харуулж чадна.

Unicode, MonKey, Arial, Arial Mon гэж юуг хэлээд байна вэ?

Unicode систем нь улс бүрийн үсгийг багтаасан нэг бүтэн систем юм. Ер нь үсэг болгон өөр өөрийн кодтой, тэгвэл Unicode бол аль ч улсын үсгийн кодыг давхцуулахгүйгээр бүртгэсэн систем юм. Үүний ачаар бичсэн текстээ дэлхийн аль ч өнцөгт үзэж засах боломжтой. Энэ нь ялангуяа интернэтэд их хэрэгтэй. Arial, Times New Roman зэрэг фонтууд нь Windows үйлдлийн системтэй цуг ирдэг Unicode фонтууд болно. Windows үйлдлийн системтэй цуг байдаг монгол гар (keyboard) нь Unicode дээр суурилсан байдаг байна. Иймд аль болох Unicode ашиглан текстээ боловсруулах хэрэгтэй.

Тэгвэл MonKey гэдэг нь монгол гар бөгөөд Unicode дээр суурилаагүй ба кирил (орос) үсгийн систем дээр ө, ү үсэг нэмж засварласан гар (keyboard) болно. Тэгэхээр Arial Mon фонт энэ гарт тохирохоор кодлогдсон үсгийн фонт болно. Arial Mon гэх мэт фонт ашиглан Windows үйлдлийн системийн стандарт монгол гар (keyboard) –аар бичвэл таарахгүй тул арзаах эсвэл дөрвөлжин тэмдэгтүүд гарна. Гэтэл зарим Arial Mon (шинэчилсэн) фонт нь Unicode кодыг агуулсан тул таардаг байна. Үүнийг анхааралдаа авна уу.

MonKey, Arial Mon хэрэглэхээс аль болох зайлсхийх шалтгааныг хэлье. Та текстээ MonKey, Arial Mon ашиглан бичжээ. Хэн нэгэнд өгөх хэрэгтэй болно. Ялангуяа шинэхэн компьютертэй хүнд өгвөл асуудал үүснэ дээ. Тэгэхээр тэр хүн уншихын тулд MonKey, Arial Mon суулгаж таарна. За тэгээд уншчихлаа, асуудал шийдэгдсэн мэт. Одоо тэгээд текстээ засахаар бол тэр хүнд аль гар хэрэглэх аль фонтоор бичих гээд асуудлууд үүсэх нь тэр. Гэтэл хүмүүсийн ихэнх нь үүнийг тоолгүй нэг хэсэгт MonKey монгол гар ашиглан, нөгөө хэсэгт Windows –н монгол гар ашиглан бичдэг. Өөрөөр хэлбэл бөөн холион бантан. Мэдээж хэрэг энэ текстээ өөр хүнд өгч таарна. Тэр хүнд бас бөөн асуудал үүсгэнэ, түүний толгойг эргүүлнэ гэх мэтээр гинжин холбоо үүсээд явах нь байна. За тэгээд хамтын бүтээлээ интернэтэд тавих боллоо. Мэдээж хэрэг дахин шивж оруулахгүйгээс хойш хуулж тавилаа. Гэтэл зарим хэсэг нь арзаасан тэмдэгтүүд болоод харагдаад эхэлнэ. Ингээд л бөөн асуудал...

Одоо та нарт хамгийн зөв шийдэл нь Unicode болох нь харагдаж байгаа биз. Unicode талаар дэлгэрэнгүй мэдээллийг
http://www.kt.mn/nuur/kt-undsen-bulanguud/zovlogoo/430-unicode-ashiglax-zovlomj.html
хуудаснаас уншиж болно. Ямар ч юм төгс байдаггүй тул Unicode –н сул тал бий.

Бас нэг асуудал гэвэл Unicode –оос өмнө бичигдсэн тэр их мэдээллээ яах вэ? ... гараар дахиж шивж оруулна гэдэг бүтэхгүй дэг. Тэгвэл MonKey монгол гараар бичсэн үсгийг Unicode уруу хөрвүүлдэг программын тусламжтайгаар хөрвүүлж болно. Жишээ нь:
http://badaa.mngl.net/convert/con2uni.htm вэб хуудах уруу орж хөрвүүлж болно.

За эргээд AutoCAD фонт уруугаа оръё. Мөн энэ фонтын А, Ж, ж, Ю, ю зэрэг үсгүүд дэх зарим нийлээгүй зураасуудыг битүүлж янзалсан болно.

@mongolfont.shx фонтыг хэрэглэх заавар.
- @MONGOLFONT.SHX файлыг татаж авна. Авахын тулд хажуугийн товчийг дарна уу.
- \Program Files\AutoCAD 20XX\Fonts    хавтаст (folder) хуулна.
- Текст бичихдээ Text Style – Font Name  -ээс @mongolfont.shx сонгоно. Хэрэв Font Name  дотор @mongolfont.shx байхгүй бол AUTOCAD программаа хаагаад дахин ажиллуулах хэрэгтэй.

Энэ фонтыг бусад хүмүүст тарааж өргөн хэрэглэцгээе.